Dy vëllezër të moshave 33 dhe 44 vjeç u vranë një javë më parë në fshatin Plloqicë të Malishevës.
Emrat e tyre janë Shani Maloku dhe Bahri Maloku, të cilët dyshohen se janë vrarë nga dy kushërinj të tyre, edhe këta vëllezër.
Dy vëllezërit u vranë me breshëri plumbash mesnatën e së premtes të kaluar, para dyerve të shtëpisë së tyre, ndërsa dy kushërinjtë janë arrestuar.
Pak para ngjarjes Shani e Bahri Maloku sikurse ndodhte shpesh, kishin mbledhur në shtëpinë e tyre djemtë e xhaxhallarëve për të luajtur me letra. Por loja aty u shndërrua më vonë në tragjedi. Nga një armë automatike dy djemtë e familjes Maloku u goditën për vdekje nga ana e disa plaçkitësve.
Mirëpo gruaja e njërit prej vëllezërve të dyshuar si vrasës, ka thënë për Express se burri i saj nuk ka lidhje me ngjarjen.
Bashkëshortja e Blerim Malokut ka rrëfyer:
Unë burrin e kam pas te shpia, jemi çu në mëngjes, e ka pi kafen. Veç ka dalë me shiku burri im çizme, kështu si unë, se mbajmë dele, ka dalë me i kqyrë fëmijët se përse u kthyn nga shkolla, ata kanë thënë që kanë ardhë shumë policë dhe kur ka dalë aty e kanë arrestu. Burri ka qenë në shtëpi natën kur ka ndodhur ajo ngjarje. Unë bëj be në fëmijët e mi që kjo ngjarje nuk ka ndodhë nga ne. Ne asnjëherë me askënd nuk kemi pasë ndonjë problem. Krejt le të çohen në këmbë se këta persona janë të pafajshëm.”
Ndërkaq, nga familja e viktimave, vëllezërve Shani e Bahri Malokut nuk kanë dashur të deklarohen rreth kësaj çështjeje. Vëllai i viktimave ka thënë se me këtë punë tashmë po merret policia.
Njëri prej vëllezërve të vrarë kishte qenë pjesëtar i FSK-së, i martuar dhe baba i katër fëmijëve. Ndërsa, edhe i vëllai tjetër përveç gruas ka lënë pas edhe dy fëmijë.
