Viti i parë i presidencës i ka kushtuar shtrenjtë Donald Trump-it. Ai ka humbur rreth 400 milionë dollarë nga pasuria e tij në një vit. Ndërsa emri i tij është rrokullisur 200 vende më poshtë në listën e miliarderëve botërorë, në vendin e 766. Aktualisht vlera e pasurisë së tij është 3.1 miliardë dollarë. Rënia filloi që kur bizneset ia morën në dorë dy djemtë Donald Xhunior dhe Erik.
Edhe në administratë, punët nuk i shkojnë fort mirë. Këshilltari i tij për ekonominë, Gary Cohn dha dorëheqjen. Ish-presidenti i një prej bankave më të mëdha Goldman Sachs nuk dha arsye specifike për vendimin e tij. Por analistët e konsiderojnë atë si një opozitar brenda administratës amerikane.
Spekulohet se ai nuk ka qenë dakord me vendosjen e taksës së importit për çelikun dhe aluminin, përkatësisht me 25 dhe 10%. Në një komunikatë për shtyp të Shtëpisë së Bardhë, Trump e vlerësoi me superlativa Cohnin, por tha se administrata e tij është në ndryshim të vazhdueshëm. Që kur mori presidencën, Trump-it i janë larguar të paktën 10 bashkëpunëtorë mes të cilëve Majkëll Flin e Stiv Banon.
