Një ditë pas grabitjes me armë zjarri në një pikë të këmbimit valutor, në qytetin e Fierit mbizotëron qetësia. Pika e këmbimit valutor që ndodhet pranë “Zogut të Zi” është e mbyllur gjatë ditës së sotme, ndërsa gazetari Evis Kuci ka dhënë detaje për “BalkanWeb” në lidhje me ngjarjen.
Mësohet se pronari i ndërtesës ku ndodhi ngjarja, i cili humbi dhe jetën, Agur Vrenzi ka ndërhyrë sapo ka pikasur grabitësit pasi ka menduar se ata janë me pistoletë lodër.
Grabitësit kanë qenë për rreth 20 minuta në pikën e këmbimit valutor dhe më pas janë larguar. Ata kanë ushtruar fillimisht dhunë psikologjike ndaj arkëtares e cila është bashkëshortja e pronarit të këmbimit valutor, Gëzim Hoxha.
Pasi ka dëgjuar të bërtiturat, pronari i ndërtesës 54-vjecari Agur Vrenozi, i cili ndodhej pranë ngjarjes, pasi në katin e dytë të ndërtesës banojnë prindërit e tij ka ndërhyrë duke qëlluar me karrige dy grabitësit, por grabitësit ishin të pajisur me armë dhe kanxë reaguar menjëherë ndaj 54 vjeçarit duke e qëlluar me plumb në kokë.
Mësohet se arkëtarja nuk ka pasur dëmtime, ndërsa pronari i plagosur i këmbimit valutor, Gëzim Hoxha është në gjendje të qëndrueshme shëndetësore. Policia arriti të kapë në kohë rekord autorët e dyshuar, Zini Fyraj, Lulëzim Demiraj, Dashamir Gergali.
