Veprimi i një mjeku për të shpëtuar një të plagosur me thikë poshtë zemrës ka bërë gjiron e rrjetit duke marrë përgëzime të shumta.
Ngjarja ka ndodhur në Bursa të Turqisë, ku një të plagosuri rëndë me thikë po i pushonte zemra, raporton agjencia turke e lajmeve “IHA”. Me të kuptuar situatën e rëndë, mjeku i urgjencës Huseyin Yenice kërceu mbi barelë duke i bërë masazh zemre pacientit deri në sallën e operacionit.
Gjithçka është filmuar sekondë pas sekonde në kamera.
Duke shpjeguar ndërhyrjen ndaj të plagosurit 32-vjeçar, Yenice tha se “ai erdhi në urgjencë rreth orës 10:20, ishte në gjendje të keqe. Kishte dy plagë thike poshtë zemrës dhe duhej ta transportonim për në sallën e operacionit.”
