Ministrja e Shëndetësisë dhe Mbrjotjen Sociale, Ogerta Manastirliu dhe drejtoresha e Organizatës Botërore të Shëndetësisë për Europën, Zsuzsanna Jakab, firmosën në Podgoricë marrëveshjen 2-vjeçare 2018-2020 për asistencën e OBSH-së për përmirësimin e shërbimit shëndetësor në vend, me synim garantimin e mbulimit shëndetësor universal të popullatës.
Kjo marrëveshje i hap rrugën forcimit të bashkëpunimit në disa fusha të rëndësishme për vendin veçanërisht në përmirësimin e programit të vaksinimit, për zbatimin e Planit Kombëtar të Veprimit për Rezistencën Antimikrobiale, për përmirësimin e mbulimit shëndetësor për menaxhimin e sëmundjeve kardiovaskulare, tumoreve, diabetit dhe sëmundjeve kronike respiratore, si dhe menaxhimit më të mirë të faktorëve të riskut.
“Shtrirja e programit të vaksinimit është në nivelin 97% në Shqipëri, duke arritur kriteret e përcaktuara nga OBSH. Megjithëse ky mbulim vaksinal është ndër më të lartët në Evropë, ne po punojmë për nxitjen e programit të vaksinimit edhe te ato grupe që e refuzojnë vaksinimin. Ne vlerësojmë mbështetjen e OBSH-së për zgjerimin e programit të vaksinimit për sëmundjet e parandalueshme përmes këtij procesi, që ne e konsiderojmë, si një të mirë publike”, u shpreh ministrja Manastirliu.
“Shqipëria ka shënuar hapa të rëndësishëm përpara sa I takon programit të vaksinimit dhe asistenca e OBSH-së do të vijojë jo vetëm për imunizimin por edhe programe të tjera për përmirësimin e shëndetit publik të popullatës”, u shpreh Jakab gjatë takimit me ministren Manastirliu.
Më herët, në takimin e 11 shteteve të Evropës Juglindore, Ministrat e rajonit dolën me një deklaratë të përbashkët për forcimin e masave për vaksinimin dhe përafrimin e programeve të tyre të vaksinimit me Planin e Veprimit për Vaksinimin të Evropës 2015–2020.
Me deklaratën e përbashkët Ministrat u angazhuan të çojnë përpara planin pesëvjeçar për imunizimin të vendeve të Evropës Juglindore, për:
· sigurimin e aksesit në financim, cilësi të vaksinave – duke tejkaluar pengesat mbi furnizimin me vaksina, legjislacionin në fuqi për prokurimin e tyre, çmimet e vaksinave dhe programet e financimit;
· sigurimin e vendimeve të bazuara në evidencë për futjen e vaksinave të reja apo rishikimin e kalendarit të vaksinave – duke siguruar krijimin e grupeve këshillimore
· ofrimin e aksesit të barabartë në programet e imunizimit dhe vaksinimit – duke siguruar që politikat e imunizimit janë jo diskriminuese, gjithëpërfshirëse, veçanërisht për komunitetet e marxhinalizuara, migrantët dhe minoritetet;
· stimulimin e kërkesës për vaksinimi në fëmijëri dhe për përfshirjen e vaksinave të reja në kalendarin kombëtar të imunizimit – duke forcuar promovimin, mobilizimin social dhe edukimin shëndetësor.
