Kampionia e botës në peshën “bantamweight” (pesha gjel) në artet marciale mikse Amanda Nunes pritet të mbrojë titullin kampion ndaj Raquel Peninngton, duel që me shumë gjasa do të zhvillohet më 12 maj, gjatë eventit të UFC-224. “Luanesha” braziliane synonte që të duelonte me Cris Cyborg, kampionen tjetër të botës, atë të peshës “featherweight” (pesha pupël). Madje marëveshja ishte gati, por u vendos që Cyborg të duelojë me Yana Kunitskaya në eventin e UFC-222.
Për pasojë, drejtuesit e UFC-së po punojnë dhe thuajse kanë arritur marrëveshjen që Nunes, e cila nuk duelon që prej shtatorit të vitit të kaluar, të përballet me Peninngton, ku do të mbrojë titullin kampion. Nunes është shprehur e pakënaqur nga kjo pritje e gjatë, ndaj UFC-ja po përpiqet t’i gjejë një rivale të denjë në eventin më të afërt. Edhe Pennington, 29 vjeçe, nuk duelon që prej nëntorit 2016, kur mundi Miesha Tate dhe korri suksesin e katërt radhazi para se të tërhiqej.
