Një ditë pas ngjarjes ku Saimir Ahmeti u arratis nga ambientet e Gjykatës së Apelit në Gjirokastër, janë vënë në pranga për shpërdorim detyre dy punonjës të Policisë së paraburgimit Sarandë, të cilët e shoqëronin të arrestuarin.
Dy punonjësit e Policisë kishin për detyrë të shoqëronin 24-vjeçarin, ndërsa pritej vendimi për rishikimin e “masës së sigurisë”, të dhënë nga Gjykata e Shkallës së Parë Sarandë një javë më parë. Por, duke përfituar nga situata, i riu është arratisur nga tualeti i Gjykatës dhe u kap pas dy orësh kërkime.
Drejtoria e Burgjeve bën me dije se ditën e mërkurë, nga Drejtoria e Shërbimit të Kontrollit të Brendshëm të Burgjeve në Ministrinë e Drejtësisë në bashkëpunim edhe me Drejtorinë e Përgjithshme të Burgjeve është bërë verifikimi i ngjarjes së ndodhur në mjediset e Gjykatës së Apelit Gjirokastër, në lidhje me procedurat e ndjekura nga punonjësit e Policisë gjatë shoqërimit të të paraburgosurve.
Pas verifikimeve të kryera, Drejtoria e Shërbimit të Kontrollit të Brendshëm të Burgjeve në Ministrinë e Drejtësisë bëri arrestimin në flagrancë të Njazi Kaçupaj, 52 vjeç dhe Fatjon Idrizi, 28 vjeç, të dy banorë të Sarandës me detyrë punonjës të Policisë në burgun e Sarandës.
Sipas Policisë, arrestimi i dy efektivëve është bërë pasi gjatë shoqërimit në ambientet e Gjykatës të të paraburgosurit Saimir Ahmeti, i arrestuar për veprën penale “Përndjekje”, nuk kanë zbatuar procedurat standarde të ruajtjes dhe shoqërimit të të paraburgosurve, si pasojë e të cilave ka ardhur largimi nga mjediset e kësaj Gjykate të këtij të paraburgosuri. Saimir Ahmeti është arritur të kapet rreth dy orë më vonë nga forcat e Policisë së Drejtorisë Vendore të Policisë Gjirokastër.
Nga kryerja e veprimeve hetimore ka rezultuar se Njazi Kaçupaj e Fatjon Idrizi kanë konsumuar elementë të veprës penale “Shpërdorim detyre”. Materialet procedurale në ngarkim të dy efektivëve të paraburgimit Sarandë i kaluan për ndjekje Prokurorisë pranë Gjykatës së Shkallës së Parë Gjirokastër.
