Një grup i strukturuar kriminal është shkatërruar nga policia italiane falë një telekamere të fshehur në televizor.
Karabinierët e Compagnia Torino San Carlos kanë arritur të ndalin 48 persona, të cilët kishin mundur të krijonin një organizatë kriminale senegaleze trafikantësh droge.
Trafikantët kishin krijuar madje edhe një “seli të përgjithshme” të tyren, në një apartament të rrugën “Vigevano 52”.
Fillimisht u ndërmorën vetëm 7 masa sigurie “arrest me burg” për përgjegjësit e zotërimit dhe shpërndarjes së drogës, por hetimi ka identifikuar edhe 41 bashkëpunëtorë të tjerë, nga të cilët 18 të arrestuar dhe 23 të akuzuar për posedim dhe shitje të narkotikëve, posedim dhe prodhim të dokumenteve false, favorizim të emigracionit klandestin dhe shfrytëzim prostitucioni.
Ajo që zbuloi trafikantët dhe aktivitetet e tyre të paligjshme, ishte një telekamera e fshehur në televizorin e apartamentit, që shërbente si laborator për paketimin dhe shitjen e lëndëve narkotike.
Furnizuesit e drogës, edhe në këtë rast thuhet të jenë dy shtetas shqiptarë, edhe pse nuk dihet gjë për identitetin e tyre.
Karabinierët kanë mundur të identifikojnë bashkëpunëtorët e grupit kriminal, që kujdeseshin për fshehjen e parave që vinin nga shitja e drogës. Këto para ri investoheshin për blerje kokaine, ndërsa një pjesë mbahej për të mbuluar shpenzimet ligjore të bashkëpunëtorëve të paraburgosur tashmë.
Gjatë operacionit u sekuestruan mbi 160 mijë euro “cash”, e një sërë dokumentesh identifikimi, mes të cilave pasaporta reale dhe të falsifikuara.
