Holanda ka tërhequr zyrtarisht ambasadorin e saj nga Turqia dhe ka deklaruar se nuk do pranojë ambasador të ri turk në Hagë. Marrëdhëniet mes dy vendeve u përkeqësuan vitin e kaluar pasi autoritetet holandeze ndaluan ministrat turq që të bënin fushatë në diasporën turke në 2017.
Diplomati holandez nuk është lejuar të hyjë në Turqi që në mars të 2017. Ministria e jashtme holandeze gjithashtu deklaroi se kishte ndërprerë bisedimet për zgjidhjen e çështjeve me Turqinë. “Nuk kemi arritur marrëveshje për normalizimin e marrëdhënieve” tha ministri e jashtëm holandez Halbe Zijlsra në një deklaratë. Dy vendet aleate të Nato-s në fillim patën përplasje për shkak të vendimit të qeverisë holandeze për të ndaluar zyrtarët e lartë turq të zhvillonin mitingje para referendumit në Turqi për zgjerimin e pushtetit të presidentit Erdogan.
Një nga ministrat turq, duke shkelur urdhrin ndalues të Holandës, arriti me makinë nga Gjermania në Roterdam për të marrë pjesë në një miting por policia e shoqëroi jashtë vendit.
Në atë kohë kryeministri holandez Mark Rutte citoi shqetësime për sigurinë para votimit për zgjedhjet e përgjithshme për të justifikuar vendimin. Qeveria turke u kundërpërgjigj duke ndaluar ambasadorin holandez, i cili ishte me pushime në atë kohë, të kthehej në Ankara.
Tërheqja zyrtare e ambasadorit holandez thellon krizën diplomatike mes Turqisë dhe disa vendeve europiane që kanë kritikuar Ankaranë për arrestimin e dhjetra mijëra njerëzve pas grushtit të dështuar të shtetit në 2016. Holanda gjithashtu është investitori më i madh i huaj në Turqi.
