Një ngjarje e rëndë është denoncuar në shkollën e bashkuar “Hajredin Beqari” në Selenicë, ku shtatë nxënëse kanë ngritur akuza për ngacmime seksuale ndaj mësuesit të edukimit fizik.
Pas kallëzimeve të bëra në polici, uniformat blu në Vlorë kanë shoqëruar 35-vjeçarin Albano Ameti, i cili prej rreth dy muajsh ishte pjesë e stafit pedagogjik të shkollës.
Denoncimet janë bërë nga vajza të moshave 14 deri në 17 vjeç. Sipas pretendimeve të ngritura, mësuesi dyshohet se ka pasur sjellje të papërshtatshme ndaj tyre, duke përfshirë ngacmime verbale dhe prekje fizike.
Rasti ka shkaktuar shqetësim edhe në komunitetin e shkollës. Disa nxënës kanë treguar se kishin dëgjuar për akuzat ndaj mësuesit, ndërsa kanë konfirmuar se disa prej vajzave janë paraqitur në Policinë e Vlorës për të dhënë dëshmitë e tyre.
Një prej nxënësve ka rrëfyer edhe disa nga shprehjet që mësuesi dyshohet se përdorte ndaj vajzave: “I ngacmonte me fjalë… ‘hajde te lali zemra’”.
Nga ana tjetër, një koleg i 35-vjeçarit, mësuesi Dritan Gargaj, është shprehur se e njihte prej rreth dy muajsh dhe se nuk beson që ai mund të ketë kryer veprime të tilla.
Ndërkohë, grupi hetimor po vijon marrjen në pyetje të nxënëseve dhe personave të tjerë që mund të kenë dijeni për ngjarjen, me qëllim dokumentimin dhe sqarimin e plotë të rrethanave.
Materialet procedurale i janë referuar Prokurorisë së Vlorës për veprime të mëtejshme.
