Erjon Vishkulli, i cili mbeti i plagosur në syrin e majtë nga një plumb gome gjatë protestës në Tiranë, ka rrëfyer momentet dramatike të goditjes dhe frikën se mund të humbasë shikimin. I riu tregon se ndodhej rreth 30 metra larg forcave të policisë kur papritur u godit, ndërsa pas vetëm dy hapash u rrëzua në tokë.
Plumbi i gomës ndodhet ende në syrin e tij të majtë, duke i shkaktuar dhimbje të forta dhe duke e lënë të pasigurt për pasojat që mund të ketë dëmtimi në shikimin e tij.
“Shkova të takoja shokët dhe do të ikja. Kisha hequr maskën e oksigjenit dhe në atë moment takova një shok gazetar. I kisha diku 30 metra larg policët, pa asnjë reagim, pa asgjë. Vetëm kur më vjen një goditje, eca rreth dy metra dhe rashë në tokë”, rrëfen Vishkulli.
Pas goditjes, ai kujton se ishte vetëm pjesërisht i vetëdijshëm. Një mik i erdhi në ndihmë dhe e transportoi me makinë, ndërsa i riu nuk mban mend shumë nga momentet që pasuan.
“Isha pak i vetëdijshëm, ndërkohë që një shok më shoqëroi me makinë. Kaq mbaj mend pastaj”, shprehet ai.
Gjendja e tij shëndetësore mbetet shqetësuese për shkak të dëmtimit në sy. Vishkulli tregon se vazhdon të ketë dhimbje të forta, ndërsa ende nuk e di nëse do të arrijë ta rikuperojë plotësisht shikimin.
“Vazhdoj ta kem ende plumbin e gomës në sy. Nuk e di tani të them se sa i lartë është rreziku, por e lehtë nuk është, sepse kam shumë dhimbje”, thotë i riu.
Për shkak të dëmtimit, është siguruar transportimi i tij drejt një spitali në Romë, ku pritet të marrë trajtim më të specializuar mjekësor. Sipas informacioneve të publikuara, nisja drejt Italisë është planifikuar për pasditen e sotme.
Pavarësisht dhimbjeve dhe pasigurisë për të ardhmen e shikimit të tij, Erjon Vishkulli e mbyll rrëfimin për gazetarin e Top Channel me një mesazh të shkurtër.
“Vetëm fitore”, shprehet ai.
I pyetur se çfarë nënkupton me këto fjalë, i riu përgjigjet: “Shqipëria është e jona”.
