Policia në Poloni ka arrestuar një person të dyshuar për kërcënimin dhe planifikimin e një sulmi ndaj kryeministrit Donald Tusk, njoftoi të dielën ministri i Brendshëm, Marcin Kierwiński.
Lajmi u bë publik pas disa orësh shqetësimi në institucionet polake, të cilat kishin marrë informacione për një komplot të mundshëm kundër kryeministrit dhe ministrit të Mbrojtjes, Władysław Kosiniak-Kamysz.
“Personi që kërcënoi dhe planifikoi një sulm ndaj kryeministrit Donald Tusk është ndaluar nga policia”, deklaroi Kierwiński, pa dhënë detaje të tjera mbi identitetin e të dyshuarit apo natyrën e sulmit që dyshohet se po përgatitej.
Vetë Tusk reagoi në rrjetin social X, ku falënderoi policinë për ndërhyrjen e shpejtë dhe vendimtare.
Arrestimi erdhi pasi institucionet polake kishin zhvilluar një mbledhje të jashtëzakonshme, ku morën pjesë përfaqësues të policisë, Shërbimit të Mbrojtjes së Shtetit dhe strukturave të sigurisë së brendshme.
Sipas autoriteteve, informacioni fillestar për kërcënimin ishte përcjellë te policia nga Shërbimi i Mbrojtjes së Shtetit, institucioni përgjegjës për sigurinë e zyrtarëve të lartë.
Zëdhënësi i shërbimeve speciale, Jacek Dobrzyński, deklaroi se kërcënimi po trajtohej me seriozitet maksimal dhe se ekzistonte një probabilitet i lartë që ai të mund të vihej në zbatim.
Ndërkohë, zëdhënësi i qeverisë, Adam Szłapka, e cilësoi kërcënimin jashtëzakonisht shqetësues.
Autoritetet nuk kanë bërë ende publike hollësi mbi motivet e të dyshuarit apo mënyrën se si ishte planifikuar sulmi.
Ngjarja vjen në një periudhë kur Polonia po përballet me shqetësime të shtuara për sigurinë, pas disa episodeve të dhunshme në shkolla dhe paralajmërimeve për rrezikun e sulmeve hibride.
Vendndodhja strategjike e Polonisë, si një prej mbështetëseve kryesore të Ukrainës dhe anëtare e NATO-s në kufirin lindor të aleancës, e ka vendosur vendin në qendër të vëmendjes së strukturave të sigurisë evropiane.
Kryeministri Tusk ka paralajmëruar më herët për mundësinë e intensifikimit të veprimeve hibride kundër vendeve që mbështesin Kievin. Moska i ka mohuar pretendimet për plane të tilla.
Hetimet për rastin vijojnë, ndërsa autoritetet polake nuk kanë dhënë ende informacione të mëtejshme mbi të dyshuarin dhe provat që çuan në arrestimin e tij.
