Pas kallëzimit penal të depozituar në SPAK ndaj ministrit të Financave, Petrit Malaj, sekretarit të përgjithshëm të ministrisë dhe drejtuesve të 16 degëve të Thesarit, ministri ka reaguar duke mbrojtur vendimin e institucionit për mos-ekzekutimin e shtesave të pagave për gjyqtarët dhe prokurorët.
Kallëzimi është dorëzuar më 8 shtator nga 20 nëpunës autorizues të gjykatave, së bashku me drejtues të Unionit të Gjyqtarëve, Shoqatës Kombëtare të Gjyqtarëve dhe Shoqatës së Prokurorëve. Ata kërkojnë hetimin e personave përgjegjës, duke i akuzuar për bllokimin e pagave të muajit gusht.
Në reagimin e tij, Malaj e cilëson situatën si një përshkallëzim të konfliktit mes pushtetit gjyqësor dhe atij ekzekutiv. Sipas ministrit, Ministria e Financave ka vepruar në përputhje me kuadrin ligjor.
“Ne kemi refuzuar të hapim dyert e thesarit të shtetit për të nxjerrë që aty pa vendim të Parlamentit një volum të konsiderueshëm parash, si shtesë rroge për gjyqtarët dhe prokurorët”, deklaroi Malaj.
Ministri argumenton se ekzekutimi i këtyre pagesave kërkon një vendim të ri të Parlamentit, ndërsa thekson se qeveria dhe përfaqësues të Kuvendit janë shprehur se vendimi i Gjykatës Kushtetuese për pagat e magjistratëve do të zbatohet.
Sipas Malajt, zgjidhja pritet të marrë formë më 17 shtator, kur parashikohet miratimi i ndryshimeve ligjore që do t’i japin Ministrisë së Financave kompetencat administrative për ndërhyrjen në këtë çështje.
Ndërkohë, ministri ka kritikuar përfaqësuesit e pushtetit gjyqësor për zgjedhjen e rrugës së kallëzimit penal, duke e konsideruar këtë një tjetër hap në përshkallëzimin e përplasjes mes dy pushteteve.
Deklarata e plotë e Malajt:
Të kallëzohesh sepse po zbaton ligjin, nga garantët e barazisë para ligjit!
Sot, në Ministrinë e Financave u depozitua një kallëzim penal për mua si titullar i institucionit, Sekretarin e Përgjithshëm dhe drejtorët e thesarit në të gjithë Shqipërinë.
Arsyeja: Kemi refuzuar të hapim dyert e thesarit të shtetit për të nxjerrë që aty pa vendim të parlamentit një volum të konsiderueshëm parash, si shtesë rroge për gjyqtarët dhe prokurorët.
Nuk dua të bëj asnjë polemikë me askënd dhe as të risqaroj pozicionin e Ministrisë së Financave, ndërkohë që është thënë publikisht nga qeveria shqiptare dhe përfaqësuesit e Parlamentit, se askush nuk do të pengojë adresimin e çështjes së pagave sipas vendimit të Gjykatës Kushtetuese. Kjo do të ndodhë më 17 shtator, kur të miratohet ligji që i jep Ministrisë së Financave të drejtën administrative të veprimit.
Por, kjo nuk i ka penguar përfaqësuesit e pushtetit gjyqësor që të përshkallëzojnë konfliktin me ekzekutivin duke nënshkruar një kallëzim penal që do ta marrë me siguri historia.
Ndërkohë unë sot dua t’u bëj me dije qytetarëve sa kushton kërkesa e kallzuesve të nderuar, sipas shkallës së pagave:
Gjyqtar i Shkallës së Parë
Është: 376, 381 Lekë
Kërkohet: 567,421 Lekë
Gjyqtar i Shkallës së Dytë
Është: 388,927 Lekë
Kërkohet: 586,335 Lekë
Gjyqtar i Grupit të III në GJKKO
Është: 659,920 Lekë
Kërkohet: 994,877 Lekë
Efekti total në buxhetin e shtetit me këto kërkesa është 40 milionë euro shtesë, çdo vit. Por nuk mbyllet këtu.
Magjistratët kërkojnë rishikim të pagave për periudhën 2023-2026 me një efekt në buxhetin e shtetit 125 milionë euro.
Ndërkohë u them drejtoreve të Thesarit në të gjithë Shqipërinë dhe Sekretarit të Përgjithshëm, që sot u kallëzuan së bashku me mua, se duhet të vazhdojnë ta kryejnë detyrën e tyre me qetësi dhe pa u intimiduar, duke ruajtur gjithmonë me rigorozitet financat e shtetit, të udhëhequr nga ligji.
