Gjatë 24 orëve të fundit janë raportuar 33 vatra zjarri në territorin e vendit, nga të cilat 8 mbeten aktive dhe 5 janë nën monitorim, ndërsa strukturat e Mbrojtjes Civile vijojnë operacionet për izolimin dhe shuarjen e tyre.
Sipas Agjencisë për Media dhe Informim, në operacionet për menaxhimin e situatës janë angazhuar 535 forca operacionale dhe 51 automjete zjarrfikëse.
Në mbështetje të tyre, Forcat e Armatosura kanë angazhuar 100 efektivë, 2 automjete zjarrfikëse, 3 helikopterë dhe 2 avionë “Air Tractor”.
Në Malin e Dajtit, Tiranë, vijon ndërhyrja nga toka dhe ajri, me angazhimin e forcave tokësore dhe dy helikopterëve. Sipas informacionit zyrtar, vatrat janë nën kontroll dhe nuk paraqitet rrezik për zonat e banuara.
Në Gurë-Lurë, Dibër, operacioni vijon me forca të shumta tokësore dhe mbështetje nga dy avionë “Air Tractor”. Edhe në këtë zonë nuk raportohet rrezik për banesat.
Në Qafë Helmës dhe Bruç, puna vijon në terren të vështirë. Zjarri në Qafë Helmës është shuar nga krahu i Bulqizës, ndërsa mbetet aktiv në drejtim të Selishtës. Strukturat në terren vijojnë ndërhyrjen dhe nuk raportohet rrezik për zonat e banuara.
Në Lufaj të Mirditës, vijon ndërhyrja pas hapjes së korridoreve ndarëse, me mbështetje edhe nga ajri.
Në Fushë-Lajë të Pukës, zjarri nuk paraqet intensitet të lartë dhe nuk ka rrezik për zonat e banuara. Ndërkohë, në Rrjoll, situata po monitorohet edhe përmes dronëve.
Agjencia Kombëtare e Mbrojtjes Civile (AKMC) vijon monitorimin e pandërprerë të situatës dhe koordinimin me strukturat qendrore e vendore të Mbrojtjes Civile, duke përqendruar kapacitetet tokësore dhe ajrore në vatrat ku kërkohet ndërhyrje më intensive.
