Policia e Durrësit ka finalizuar operacionin e koduar “Përdorimi”, duke vënë në pranga një 24-vjeçar që dyshohet se blinte produkte dhe kryente pagesa me kartëmonedha euro të falsifikuara. Sipas njoftimit zyrtar, specialistët e Seksionit për Hetimin e Krimit Ekonomik dhe Financiar në DVP Durrës, në bashkëpunim me shërbimet e Komisariatit të Policisë Kavajë dhe nën drejtimin e Prokurorisë, nisën hetimet pas një kallëzimi se një shtetas kishte mashtruar në një pikë karburanti duke paguar me kartëmonedha të dyshuara të falsifikuara.
Si rezultat i veprimeve të shpejta hetimore u bë i mundur identifikimi, lokalizimi, kapja dhe arrestimi në flagrancë i shtetasit M. Rr., 24 vjeç.
Nga hetimet dyshohet se 24-vjeçari furnizoi automjetin me karburant në një pikë karburanti në fshatin Sinaballaj, Rrogozhinë, dhe kreu pagesën me tre kartëmonedha 20 euro, të dyshuara të falsifikuara. Gjatë kontrollit fizik, policia gjeti në portofolin e tij edhe 10 kartëmonedha të tjera me prerje 20 euro, gjithashtu të dyshuara të falsifikuara, të cilat u sekuestruan në cilësinë e provës materiale.
Në total, autoritetet sekuestruan 13 kartëmonedha me prerje 20 euro, të dyshuara të falsifikuara. Nën drejtimin e Prokurorisë vijojnë veprimet hetimore për dokumentimin e plotë të kësaj veprimtarie kriminale dhe për identifikimin e personave të tjerë që mund të jenë të përfshirë. Materialet procedurale i janë referuar Prokurorisë për veprime të mëtejshme.
