Një zjarr i përmasave të mëdha ka përfshirë mesditën e kësaj të hëne fshatin Llakatund, në Vlorë. Flakët kanë marrë përmasa të konsiderueshme dhe, të favorizuara nga era e fortë, po përhapen me shpejtësi në zonat përreth.
Vatra e zjarrit ka përfshirë sipërfaqe me bimësi, ndërsa menjëherë pas njoftimit drejt vendngjarjes janë nisur dy automjete të shërbimit zjarrfikës për të izoluar dhe shuar flakët.
Forcat zjarrfikëse po punojnë për ta vënë situatën nën kontroll dhe për të parandaluar përhapjen e zjarrit drejt banesave apo sipërfaqeve të tjera.
Deri në këto momente nuk raportohen persona të lënduar, ndërsa autoritetet po monitorojnë situatën.
