Presidenti i Serbisë, Aleksandar Vuçiç, deklaroi të shtunën se do të japë dorëheqjen brenda disa javësh dhe njoftoi mbajtjen e zgjedhjeve të parakohshme presidenciale dhe parlamentare.
Njoftimk i Vuçiçit vjen pas një viti e gjysmë protestash kundër korrupsionit, të udhëhequra nga studentët, që përfshinë të gjithë vendin pas shembjes së një strehe në stacionin hekurudhor të qytetit verior të Novi Sad, ku humbën jetën 16 persona.
Pak ditë më parë, në Novi Sad, studentët përkujtuan viktimat e vitit 2024 dhe kërkuan zgjedhje të parakohshme të përgjithshme.
“Do të jem president vetëm edhe për disa javë dhe më pas do të jap dorëheqjen,” u tha Vuçiç mbështetësve të tij gjatë një tubimi proqeveritar në kryeqytetin, Belgrade. Mandati i tij i dytë dhe i fundit përfundon në mesin e vitit 2027.
Vuçiç deklaroi gjithashtu se do të ndihmojë Partinë Progresive Serbe të fitojë zgjedhjet, përfshirë edhe votimin e parakohshëm parlamentar, i cili fillimisht ishte planifikuar për vitin 2027. Megjithatë, ai nuk specifikoi se kur do të japë dorëheqjen dhe as kur mund të shpërndajë parlamentin, një kusht i domosdoshëm për mbajtjen e zgjedhjeve të parakohshme parlamentare.
Protestuesit, opozita dhe organizatat për të drejtat e njeriut pretendojnë se tragjedia në stacionin hekurudhor ishte shenjë e keqmenaxhimit të projekteve të ndërtimit dhe e korrupsionit në qeveri. Aktivistët e lëvizjes studentore thonë se synojnë të sfidojnë Vuçiçin dhe SNS-në në zgjedhjet e ardhshme parlamentare dhe presidenciale.
