Një skenë e pazakontë është regjistruar në protestën para Kryeministrisë, ku pas flamingove prej kartoni, protestuesve u janë bashkuar edhe një tufë dhish të sjella nga Kelmendi.
Protestuesit, duke mbajtur në duar një gardh rrethues, kanë lëvizur së bashku me kafshët, ndërsa në gardh ishin vendosur postera me mesazhe të ndryshme, si: “Erdhëm të mbrojmë malet para se të na i marrë qeveria”, “Ndaloni ekocidin”, “Jemi protestuese strategjike”, “Nuk aspirojmë për politikë, duam vetëm ujë në lumë” dhe “Dhitë bashkohen me flamingot”.
Sipas organizatorëve, prania e dhive në protestë synon të tërheqë vëmendjen ndaj çështjeve mjedisore dhe mbrojtjes së natyrës.
Ndërkohë, protestuesit janë parë duke ushqyer kafshët, ndërsa prania e tyre ka tërhequr vëmendjen e qytetarëve dhe kalimtarëve në zonën para Kryeministrisë.
