Parlamenti i Hungarisë miratoi një amendament kushtetues që kufizon mandatin e kryeministrit në maksimum tetë vjet, një lëvizje që mund të pengojë rikthimin në pushtet të ish-kryeministrit hungarez Viktor Orbán.
Amendamenti u miratua me 135 vota pro dhe 50 kundër dhe parashikon zbatimin retroaktiv të kufizimit të mandateve. Nëse hyn në fuqi, Orbán, i cili ka shërbyer gjithsej 20 vjet si kryeministër, nuk do të mund të kandidojë më për këtë post.
Propozuesi i amendamentit, deputeti Márton Melléthei-Barna, e cilësoi nismën si një hap të rëndësishëm për rindërtimin demokratik të vendit dhe forcimin e shtetit ligjor.
Qeveria e kryeministrit aktual Péter Magyar, e cila gëzon shumicën prej dy të tretash në parlament, ka ndërmarrë një sërë reformash kushtetuese të premtuara gjatë fushatës, në kuadër të asaj që e quan “ndryshim regjimi.
Megjithatë, kritikët argumentojnë se dispozita retroaktive mund të përballet me sfida ligjore dhe se mbetet e paqartë nëse kufizimi mund të zbatohet për mandatet e kryera para miratimit të amendamentit.
Projektligji tashmë i kalon për dekretim presidentit hungarez Tamás Sulyok. Në rast se ai vendos ta kthejë për rishqyrtim, parlamenti mund ta miratojë sërish me votim.
Përveç kufizimit të mandateve, amendamenti parashikon edhe shfuqizimin e Zyrës së Mbrojtjes Sovrane, një institucion i kritikuar nga Komisioni Evropian si në kundërshtim me ligjin e Bashkimit Evropian, si dhe i jep qeverisë kompetenca për shpërbërjen e fondacioneve të besimit publik të krijuara gjatë qeverisjes së Orbánit.
