Një ngjarje e rëndë është regjistruar pak minuta më parë në Liqenin e Ulzës, ku një i ri, teksa po lundronte me motor uji, dyshohet se ka humbur jetën.
Sipas informacioneve paraprake, në vendngjarje kanë mbërritur forcat e policisë dhe grupi hetimor për të zbardhur rrethanat e ngjarjes.
Mësohet se drejt vendit të ngjarjes është nisur edhe Kryeprokurori i Dibrës, Abaz Muça, për të ndjekur nga afër hetimet. Deri në këto momente nuk dihet ende identiteti i viktimës dhe nëse bëhet fjalë për një turist apo banor të zonës.
Autoritetet po vijojnë kërkimet dhe verifikimet, ndërsa pritet një njoftim zyrtar për detaje të mëtejshme mbi këtë ngjarje tragjike.
Liqeni i Ulzës është një nga zonat më të frekuentuara turistike për aktivitete ujore gjatë sezonit veror.
