Pasojat ekologjike të konfliktit në Iran ende nuk janë përcaktuar plotësisht, por konsiderohen shkatërruese për mjedisin, se përmes sulmeve ndaj infrastrukturës së naftës çlirohen substanca shumë toksike.
Gjatë sulmeve ajrore të SHBA-së dhe Izraelit ndaj Iranit janë goditur dhjetëra objekte nafte. Nga ana tjetër, Irani ka vënë në shënjestër instalimet për nxjerrjen dhe përpunimin e naftës në disa shtete të Gjirit Persik. OKB-ja ka paralajmëruar se lufta aktuale në Iran po shkakton pasoja të rënda edhe për mjedisin dhe klimën, sepse përmes sulmeve ndaj infrastrukturës së naftës çlirohen substanca shumë toksike.
Edhe pse dëmet e shkaktuara prej luftimeve ende nuk mund të përcaktohen me shifra konkrete, sipas një analize të think tank-ut britanik Conflict and Environment Observatory konflikti paraqet një “rrezik të madh për dëme akute dhe afatgjata”. Sepse konsiderohet e sigurt se sulmet ndaj impianteve të naftës dhe të gazit, si dhe ndaj rafinerive, po e rëndojnë ndjeshëm rajonin.
Dëme për ekosistemet
Në tokë kanë depërtuar lëndë djegëse fosile, metale të rënda dhe substanca per- dhe polifluoroalkile që janë shumë rezistente ndaj ujit dhe nxehtësisë, ndërsa zjarret kanë çliruar ndotës si dioksinat dhe furanet.
Po ashtu mjedisi ndotet edhe prej gazrave që shkaktohen nga përdorimi i armëve apo nga zjarret në terminalet e naftës. Gjithashtu janë regjistruar edhe emetime të mëdha gazrash që shkatojnë efektin serrë, dëme ndaj sistemit të furnizimit me ujë të pijshëm dhe përkeqësim i krizës së ujit në Iran.
Sipas ekspertëve zjarret ndaj cisternave të naftës në rajon përbëjnë rrezik në rritje edhe për peshqit dhe gjallesat detare. Megjithatë mungojnë ende shumë të dhëna, ndaj një vlerësim i plotë i rreziqeve të mundshme për ekosistemet, tokën, ujin, ajrin dhe ushqimin nuk është ende i mundur.
Si pasoja të tërthorta konsiderohen edhe përdorimi i shtuar i qymyrit në vend të gazit në vendet që importojnë gaz, si dhe në të ardhmen nga emetimet e larta të CO₂ për rindërtimin e infrastrukturës së shkatërruar nga lufta./DW
