Të paktën 62 persona kanë humbur jetën këtë javë në Kenya si pasojë e përmbytjeve të shkaktuara nga reshjet e dendura të shiut që kanë goditur pjesë të mëdha të vendit, sipas autoriteteve lokale.
Shirat e rrëmbyeshëm të javës së kaluar kanë shkaktuar përmbytje të paprecedenta, duke bërë që lumenjtë të dalin nga shtrati, ndërsa shumë shtëpi janë përmbytur dhe infrastruktura është dëmtuar rëndë. Rrugë të shumta janë mbyllur pasi disa ura janë dëmtuar në zona të ndryshme të Nairobit, ndërsa disa shkolla janë përmbytur.
Ministria e Brendshme e Kenias paralajmëroi të dielën se reshjet e dendura pritet të vazhdojnë në disa rajone të vendit, duke rritur më tej rrezikun për përmbytje. Autoritetet u kanë bërë thirrje banorëve të zonave të ulëta të largohen drejt vendeve më të sigurta.
Sipas të dhënave zyrtare, më shumë se 2,000 persona janë detyruar të braktisin shtëpitë e tyre për shkak të situatës.
Përmbytjet kanë prekur edhe Ethiopinë fqinje, ku mbi 100 persona kanë humbur jetën si pasojë e përmbytjeve dhe rrëshqitjeve të dheut në pjesën jugore të vendit.
