Presidenti i Ukrainës, Volodymyr Zelensky, deklaroi se deputetët ukrainas duhet të zgjedhin mes vazhdimit të punës në parlament ose shërbimit në vijën e parë të frontit, në kushtet e luftës që po vazhdon prej vitesh.
Gjatë një deklarate, Zelensky tha se që nga fillimi i pushtimit në shkallë të plotë nga Rusia, disa anëtarë të parlamentit kanë kërkuar të japin dorëheqjen. Megjithatë, sipas tij, gjatë gjendjes së jashtëzakonshme parlamenti duhet të vazhdojë të funksionojë plotësisht.
“Ne jemi nën gjendje të jashtëzakonshme dhe shteti duhet të mbrohet. Prandaj, anëtarët e parlamentit ose duhet të shërbejnë në parlament në përputhje me ligjin ukrainas, ose jemi të gatshëm të diskutojmë ndryshime në ligjin e mobilizimit në mënyrë që ata të mund të shkojnë në front”, u shpreh ai.
Presidenti ukrainas theksoi se në një kohë lufte çdo funksionar publik duhet të kontribuojë në mbrojtjen e vendit. “Nëse nuk i shërben shtetit në parlament, atëherë shërbeji shtetit në vijën e parë. Kjo është qasja ime”, deklaroi Zelensky.
