Shqipëria gjithashtu po përfaqësohet në Konferencën e Mynihut me anëtarë të parlamentit.
Në delegacion mungoi kryeministri Edi Rama, i cili e ka përfaqësuar vendin në vitet e kaluara. Fakt të cilin kreu i PD-së Sali Berisha, e lexoi si mbyllje dere nga ndërkombëtarët. Report Tv kërkoi edhe një reagim nga zyra e shtypit të kryeministrisë, por u tha se për këtë çështje nuk do të ketë një qëndrim zyrtar.
Të pranishëm në Konferencën e Mynihut, Taulant Balla zhvilloi një drekë pune me emisarin Special të Donald Trump për misione speciale , ndërsa nga opozita Klevis Balliu ishte në një nga seminaret për sigurinë kibernetike.
Ministri i Mbrojtjes Pirro Vëngu mbajti në Mynih një takim trepalësh me homologun kroat Ivan Anusiç dhe me ministrin e Mbrojtjes të Kosovës Ejup Maqedonci, me fokus bashkëpunimin në mbrojtjen e përbashkët.
Vengu e ministrja e Jashtme, Elisa Spiropali përcollën mesazhin se Shqipëria po vijon me kontributin për forcimin e partneritetit transatlantik.
Në Gjermani, në edicionin e 62-të të Konferencës së Sigurisë në Mynih, ndodhet edhe kryeministri i Kosovës, Albin Kurti.
