Në vendet nordike, në krye të listës së aplikacioneve më të shkarkuara në App Store nuk është më ChatGPT, dhe as aplikacionet për gjurmimin e aurorave boreale, edhe pse ka nisur sezoni më i mirë për vëzhgimin e fenomenit mbresëlënës.
Në vend të tyre, qytetarët po shkarkojnë gjithnjë e më shumë aplikacione që shërbejnë për të identifikuar dhe bojkotuari produktet me origjinë amerikane. Shkak për këtë trend është bërë retorika e vazhdueshme e presidentit amerikan Donald Trump për Groenlandën, territor autonom që i përket Mbretërisë së Danimarkës.”
Në këtë mënyrë, qytetarët danezë kanë nisur një formë rezistence ekonomike. Sipas të dhënave të publikuara nga portali 9to5Mac, aplikacioni UdenUsa, që do të thotë “Pa SHBA”, është ngjitur brenda pak ditësh në vendin e parë në App Store në Danimarkë. Më 9 janar, ai renditej në vendin e 441-të. Edhe aplikacioni Made O’Meter ka hyrë këtë javë në top 5.
Rritja e shkarkimeve është regjistruar si në pajisjet iOS, ashtu edhe në Android, dhe fenomeni nuk kufizohet vetëm në Danimarkë, por shtrihet edhe në Norvegji, Suedi dhe Islandë. Aplikacioni UdenUsa synon t’u ofrojë konsumatorëve transparencë mbi origjinën e produkteve dhe mundësinë për të shmangur markat në pronësi amerikane. Përdoruesit skanojnë kodin e barkodit të produktit dhe aplikacioni tregon origjinën dhe zinxhirin e furnizimit.
Nëse produkti lidhet me SHBA-në, sugjerohet një alternativë vendase. Pavarësisht nismës, ekspertët vlerësojnë se ndikimi real ekonomik i këtyre aplikacioneve është i kufizuar, pasi produktet amerikane përbëjnë vetëm rreth 1% të shitjeve totale në Danimarkë. Studiuesi i sjelljes, Pelle Guldborg Hansen nga Universiteti i Roskilde-s, tha se aplikacionet janë më shumë një reagim emocional dhe shoqëror ndaj deklaratave të Trump, sesa një efekt real i një bojkoti masiv.
