Viti 2025 mund të konsiderohet pa dyshim një vit i dhimbshëm për Shqipërinë, një vit humbjesh që la pas një boshllëk të thellë në jetën publike dhe kulturore të vendit. Ndarja nga jeta e një sërë figurash të shquara në art, politikë, kulturë dhe media e bëri kombin më të varfër shpirtërisht dhe më të heshtur në zërat e tij më përfaqësues.
Brenda këtij viti, Shqipëria humbi personalitete që për dekada me radhë kontribuuan në ndërtimin e identitetit kombëtar, duke lënë gjurmë të pashlyeshme në politikë, kinematografi, teatër, muzikë dhe gazetari. Ishin njerëz që formësuan mendimin publik, kultivuan artin dhe i dhanë shoqërisë modele përkushtimi dhe përgjegjësie. Kujtimi i tyre mbetet një pasuri e çmuar dhe një detyrim moral për t’u ruajtur e respektuar nga brezat që vijnë.
Alpenews.al ju rijkujton figurat që ndërruan jetë gjatë 2025.
Më 25 janar, në moshën 95-vjeçare vdiq kryepeshkopi i Tiranës, Durrësit dhe i Gjithë Shqipërisë, Anastas Janullatos.
Më 9 mars u nda nga jeta në moshën 53-vjeçare Andis Harasani, ish-deputet dhe një nga figurat e njohura të politikës dhe sektorit energjetik.
Më 3 prill 2025, u nda nga jeta Margarita Xhepa, një nga aktoret më të mëdha të teatrit dhe kinemasë shqiptare, një ditë pas 93-vjetorit të lindjes së saj.
Më 23 maj 2025, u nda nga jeta Artan Lame, publicist, historian dhe figurë aktive në fushat e trashëgimisë kulturore dhe medias.
Më 24 maj, u nga jeta në moshën 86-vjeçare regjisori i shquar shqiptar Piro Milkani, një nga kolosët dhe baballarët e Kinematografisë shqiptare, me mbi 20 prodhime që qëndrojnë në majën e artit dhe kulturës.
Më 28 gusht 2025, u nda nga jeta Naun Shundi, aktor, regjisor dhe dramaturg i shquar, në moshën 66-vjeçare.
Gjatë muajit gusht, humbja e papritur e Artur Zhejit, gazetarit dhe analistit të njohur të medias shqiptare, pas një arresti kardiak, tronditi komunitetin e medias.
Më 1 shtator, kineasti i njohur, Dhimitër Anagnosti u nda nga jeta në moshën 89-vjeçare, i vlerësuar si një nga regjisorët shqiptarë më të rëndësishëm të shekullit XX.
Më 22 shtator u nda nga jeta aktori në moshën 71-vjeçare Enver Petrovci, ikona e filmit dhe teatrit në Shqipëri dhe Kosovë.
Më 31 tetor 2025, Fatos Nano, ish-kryeministër i Shqipërisë dhe figurë kyçe në udhëheqjen politike pas tranzicionit të viteve ’90, ndërroi jetë në moshën 73-vjeçare pas një beteje të gjatë me sëmundje kronike të frymëmarrjes dhe komplikacione tjera shëndetësore
Më 26 nëntor 2025, Shpat Kasapi, këngëtar i njohur shqiptar, u nda papritur nga jeta në moshë 40-vjeçare si pasojë e një arresti kardiak të papritur ndërsa ndodhej në Monza, Itali.
