Policia e Shtetit ka zbardhur vrasjen e Pavlin Prekës, ngjarje e ndodhur disa muaj më parë, duke çuar në arrestimin e dy personave të dyshuar si autorë të krimit. Dy të arrestuarit janë :Klaudio Lisaj, 20 vjeç, banues në fshatin Mgull, Vasel Koçeku, 43 vjeç, banues në fshatin Hot i Ri.
Të dy dyshohen për “vrasje me paramendim” të kryer në bashkëpunim, si edhe për “mbajtje pa leje dhe prodhim të armëve, armëve shpërthyese dhe municionit”, materialet procedurale janë referuar në Prokurorinë e Shkodrës për veprime të mëtejshme ligjore.
Dinamika e krimit, si ndodhi ngjarja?
Ngjarja ndodhi më 27 shkurt 2025, kur Pavlin Preka u gjet i pajetë në oborrin e shtëpisë së tij, pas një plumbi në trup. Sipas hetimeve paraprake, ai ishte qëlluar me armë zjarri tip pistoletë në pjesën e gjoksit.
Familjarët e kishin gjetur të shtrirë pa shenja jete në oborr, ndërsa hetuesit kishin ngritur fillimisht një grup të posaçëm për të dokumentuar rrethanat dhe për të identifikuar autorin/autorët. Gjatë hetimit janë sekuestruar gëzhoja dhe është kreu punë për analizimin e provave fizike dhe hetimin e lidhjeve mes viktimës dhe personave të dyshuar.
Operacioni policor për arrestimin e autorëve u realizua me mbështetjen e Forcës Kombëtare të Sigurisë, Njësisë Shkodër, Forcës së Posaçme “Shqiponja” dhe shërbimeve të Komisariatit të Policisë Shkodër.
