Në një ceremoni të posaçme sot më 16 dhjetor 2025, të zhvilluar në Sallën e Kolegjeve të Bashkuara, u urua fillimi i detyrës për gjyqtarin e ri, i cili u emërua anëtar i Gjykatës së Lartë duke zëvendësuar gjyqtarin Medi Bici.
Gjatë ceremonisë u theksua rëndësia e forcimit të vazhdueshëm të trupës gjyqësore me magjistratë që kanë dëshmuar profesionalizëm, integritet dhe përkushtim ndaj vlerave të drejtësisë.
Kryetari i Gjykatës së Lartë Sokol Sadushi, në fjalën e tij u shpreh se, gjyqtari Genti Shala i bashkohet trupës me një profil profesional të konsoliduar dhe përvojë të çmuar në sistemin e drejtësisë. Kontributi i tij pritet të forcojë më tej cilësinë e vendimmarrjes dhe misionin kushtetues të Gjykatës së Lartë për garantimin e një drejtësie të besueshme dhe efikase.
Kryetari Sadushi vlerësoi kontributin e gjyqtarit që përfundoi detyrën, duke theksuar se gjyqtari Medi Bici ka dhënë një kontribut të rëndësishëm dhe të çmuar ndër vite në veprimtarinë e Gjykatës së Lartë, duke ushtruar funksionin e tij me profesionalizëm, përgjegjshmëri dhe integritet.
Gjykata e Lartë i uron gjyqtarit Genti Shala suksese në ushtrimin e detyrës së tij dhe shpreh mirënjohjen për kontributin e dhënë nga gjyqtari Medi Bici.
