Të shtëna me armë zjarri janë raportuar në qytetin e Kukësit. Mësohet se ngjarja ka ndodhur në ambientet e një biznesi gjatë natës, ndërsa vetëm në orët e para të mëngjesit janë konstatuar gëzhojat.
Pas denoncimit nga pronari i biznesit, policia ka shkuar në vendin e ngjarjes dhe ka rrethuar zonën.
Siç shihet edhe në këtë foto plumbat kanë prekur derën kryesore të biznesit.
Po ashtu një grup hetimor po punon për të zbardhur ngjarjen.
Kukës / Informacion paraprak
Sot, më datë 28.11.2025, rreth orës 09:30, shtetasi L. O., ka njoftuar sallën operative të Drejtorisë Vendore të Policisë Kukës se ka konstatuar të dëmtuar fasadën me xham të dyqanit të tij.
Menjëherë në vendngjarje kanë shkuar shërbimet e Policisë dhe grupi hetimor.
Nga këqyrja e vendit të ngjarjes rezulton se fasada është dëmtuar me armë zjarri gjatë natës.
Grupi hetimor, nën drejtimin e Prokurorisë, po vijon punën për sqarimin e rrethanave të ngjarjes, identifikimin dhe kapjen e autorit/ve.
