Një person me kapuç dhe me biçikletë është filmuar nga kamerat e sigurisë teksa hedh sasinë e tritolit në vilën e deputetit demokrat, Xhelal Mziu. Burime nga grupi hetimor bëjnë me dije për Report Tv se kamerat e sigurisë pranë vilës së Mziut e kanë fiksuar autorin i cili vjen me një biçikletë. Ai ndalon para vilës së deputetit Mziu dhe vendos në pjesën e murit rrethues sasinë e vogël të tritolit. Më pas menjëherë largohet me biçikletë.
Në pamje ai duket se ka vepruar i vetëm. Kamerat e kanë fiksuar deri në afërsi të Universitetit Bujqësor dhe më pas i humbasin gjurmët. Në pamjet e kamerave të sigurisë dallohet se autori ishte i veshur me rroba të errëta dhe me kapuç.
Për ngjarjen, deputeti i Sali Berishës është pyetur sërish nga grupi hetimor, por ai i ka qëndruar së njëjtës dëshmi, duke thënë se nuk ka konflikte me persona të tjerë.
Shpërthimi me tritol ndodhi rreth orës 01:00 të 19 shtatorit, duke lënë pas vetëm dëme materiale. Vila 2 katëshe ku banon deputeti i Sali Berishës, është e rrethuar me mur dhe kangjella, territor brenda të cilit ndodhen edhe disa vila të vëllezërve e familjarëve të tij.
Vala goditëse e shpërthimit dëmtoi një prej dritareve të vilës, xhami i së cilës u plasarit.
Pas ngjarjes, Mziu e Sali Berisha dolën në një konferencë për shtyp, ku akuzuan se ngjarja ka prapavijë politike.
Mziu doli deputet nga 11 maji pasi ishte pjesë e listës së sigurt në qarkun Dibër. Gjatë fushatës, ai u përfshi në një incident, ku një zyrtar në Bulqizë e denoncoi në polici për dhunë.
