Në një pritje të organizuar me rastin e Ditës së Kushtetutës, e Ngarkuara me Punë e Shteteve të Bashkuara në Tiranë, Karen VanHorn, theksoi rëndësinë e parimeve themelore që mbështesin një demokraci funksionale: mbrojtja e të drejtave individuale, ndarja e pushteteve, liria e fjalës dhe sundimi i ligjit.
“Këto parime nuk janë thjesht ideale abstrakte; ato janë themeli i besimit midis qeverive dhe qytetarëve të tyre. Ato sigurojnë drejtësi të drejtë, pushtet të balancuar dhe respekt për të drejtat e çdo individi,” u shpreh VanHorn.
Duke iu drejtuar gjyqtarëve, prokurorëve, shoqërisë civile dhe medias së lirë, ajo i quajti ata “rojtarët e të drejtave të çdo qytetari shqiptar”, me një rol kyç në ruajtjen e transparencës, drejtësisë dhe llogaridhënies.
VanHorn theksoi se ky mision kërkon guxim, veçanërisht në një klimë ku integriteti vihet shpesh në provë:
“Guximi për të marrë vendime të vështira, për të qëndruar kundër korrupsionit dhe për të mos u lëkundur përballë trysnisë.”
Sipas saj, Kushtetuta nuk është thjesht një tekst juridik, por një premtim i vazhdueshëm për të mbrojtur të drejtat, për të garantuar drejtësi dhe për të ndërtuar një të ardhme më të mirë për të gjithë qytetarët.
“Sot nderojmë guximin e atyre që na paraprinë dhe angazhimin e tyre për këto parime. Shpresojmë që secili prej nesh të gjejë forcën për të mbështetur idealet që e bëjnë demokracinë të mundur,” përfundoi VanHorn.
Fjalimi i plotë:
Të nderuar të ftuar, është një privilegj të qëndroj para jush sot, ndërsa përkujtojmë Ditën e Kushtetutës – një ditë që na kujton fuqinë e qëndrueshme të kushtetutës së SHBA-së, e cila mbron të drejtat e individëve dhe e udhëzon kombin tonë drejt drejtësisë dhe prosperitetit.
Kushtetutat ndërtohen mbi parime thelbësore për një demokraci funksionale: mbrojtja e të drejtave individuale, ndarja e pushteteve, liria e fjalës dhe sundimi i ligjit. Këto parime nuk janë thjesht ideale abstrakte; ato janë themeli i besimit midis qeverive dhe popullit të tyre. Ato sigurojnë që drejtësia të zbatohet në mënyrë të drejtë, pushteti të jetë i balancuar dhe të drejtat e çdo individi të respektohen.
Gjyqtarët, prokurorët, anëtarët e shoqërisë civile dhe shtypi i lirë janë mbrojtësit e të drejtave të çdo qytetari shqiptar. Ju keni fuqinë të siguroni që drejtësia të mos jetë vetëm një fjalë, por një realitet për të gjithë shqiptarët. Ju keni përgjegjësinë për të mbështetur drejtësinë, transparencën dhe llogaridhënien. Dhe keni mundësinë të forconi besimin midis njerëzve dhe institucioneve që u shërbejnë atyre.
Kjo punë kërkon guxim — guximin për të marrë vendime të vështira, për t’i rezistuar korrupsionit dhe për të qëndruar të vendosur përballë presionit. Ndërsa vazhdoni punën tuaj jetësore, mos harroni se një kushtetutë është më shumë sesa një dokument ligjor. Është një premtim i gjallë për të mbrojtur të drejtat, për të mbështetur drejtësinë dhe për të ndërtuar një të ardhme më të mirë për të gjithë.
Në këtë Ditë të Kushtetutës, ne nderojmë guximin e atyre që erdhën para nesh duke u përkushtuar ndaj këtyre parimeve.
Faleminderit për përkushtimin tuaj ndaj këtij misioni dhe shpresojmë që të gjithë të gjejmë guximin për të mbështetur idealet që e bëjnë të mundur demokracinë.
