Një shtetas shqiptar, 41-vjeçari Edson Jozwik alias Edson Pjetri, u ekstradua nga Belgjika në Shqipëri, pas një bashkëpunimi ndërkombëtar që mundësoi finalizimin e procedurave ligjore.
Pjetri ishte shpallur në kërkim ndërkombëtar nga Gjykata e Posaçme e Shkallës së Parë për Korrupsionin dhe Krimin e Organizuar, me masën e sigurisë “Arrest në burg”, për veprat penale të trafikimit të lëndëve narkotike, pastrimit të produkteve të veprës penale dhe pjesëmarrjes në grup kriminal të strukturuar.
Hetimet zbuluan se gjatë periudhës qershor–nëntor 2020, Pjetri, në bashkëpunim me persona të tjerë, dyshohet se ka trafikuar rreth 160 kg cannabis sativa nga Shqipëria në Malin e Zi, me destinacion vendet e Bashkimit Europian.
Ai iu dorëzua Drejtorisë së Përgjithshme të Burgjeve, ndërsa autoritetet nënvizojnë se bashkëpunimi ndërkombëtar mbetet një mjet kyç për lokalizimin dhe ekstradimin e personave të shpallur në kërkim.
