Qeveria ‘Rama 4’ do të nisë punën për 6 reforma të reja ligjore, të cilat prekin disa sektorë të rëndësishëm, një prej tyre edhe menaxhimin e hapësirave publike. Lajmi u bë me dije nga kreu i qeverisë Edi Rama përmes një postimi në rrjetin social ‘X’, ku i jep përgjigje edhe debateve për aksionin për lirimin e hapësirave publike.
Kryeministri shkruan se me ligjin e ri për kontrollin dhe zhvillimin e territorit nuk do të ketë më ‘tokë të xanum’, që deri më tani thekson se janë toleruar nga qeverisja vendore në kurriz të komunitetit apo lejeve me shkelje në kurriz të qytetit. Krahas kësaj reforme, Rama njofton se puna ka nisur paralelisht edhe për reforma të tjera në disa sektorë, si furnizimi me ujë, një problematikë të cilën e ngriti sidomos në qarkun e Vlorës, apo edhe për sistemin e pastrimit e të përpunimit të mbetjeve.
“Toleranca ndaj tokave të xanuna në kurriz të komunitetit apo lejeve me shkelje në kurriz të qytetit, që janë pranuar nga qeverisja vendore si bashkëudhëtare të jetës urbane, ndërkohë që inspektoriatet e mbrojtjes së territorit dhe policitë bashkiake janë bërë në të shumtën e rasteve pjesë e problemit, do të adresohet rrënjësisht me një reformë të re ligjore të kontrollit e të zhvillimit të territorit, për të cilën kemi nisur nga puna paralelisht me disa reforma të reja të shërbimit me ujë të pishëm, të sistemit të pastrimit e të përpunimit të mbetjeve, të furnizimit të popullit me naftë e me barna, si edhe të shërbimit spitalor, që do të jenë piketat e hyrjes në rrugën e mandatit tonë të katërt për Shqipërinë 2030 në Bashkimin Europian”, shkruan Rama.
Reformat e tjera do të shtrihen tek shërbimi spitalor, te furnizimi i popullit me barna, siç thotë kryeministri, apo edhe tek furnizimi me naftë. Për këtë të fundit, Rama ka paralajmëruar se Qeveria shqiptare do ndërhyjë në çmimin e naftës dhe brenda këtij viti do të vendoset një ekuilibër i ri të çmimi i naftës për konsumatorët, me qëllim lehtësimin e barrës ekonomike për qytetarët. Të gjitha këto reforma, Rama thotë se do të jenë piketat e hyrjes në rrugën e mandatit tonë të katërt për Shqipërinë 2030 në Bashkimin Europian.
