Gjyqtarja e Posaçme Elsa Ulliri është caktuar kryetare e trupës gjykuese që do të shqyrtojë dosjen e bujshme “Partizani”, ku të pandehur janë ish-kryeministri Sali Berisha, dhëndri i tij Jamarbër Malltezi dhe tre persona të tjerë të dyshuar si bashkëpunëtorë.
Përzgjedhja e trupës u bë me short këtë të hënë në Gjykatën e Posaçme Kundër Korrupsionit dhe Krimit të Organizuar (GJKKO). Përveç Elsa Ullirit, anëtarë të tjerë të trupës pritet të jenë gjyqtarët Bib Ndreca dhe Rudina Palloi.
Berisha dhe Malltezi akuzohen nga SPAK për korrupsion dhe pastrim parash, lidhur me përfitimet në privatizimin dhe zhvillimin e pronës ku ndodhej ish-kompleksi sportiv “Partizani”.
Procesi gjyqësor ndaj tyre pritet të jetë një nga më të ndjekurit e viteve të fundit, për shkak të përmasave politike dhe publike të çështjes.
