Vatikani ka lajmëruar se do të pezullojë të gjitha komunikimet telefonike brenda territorit të tij gjatë konklavës për zgjedhjen e papës së ri, duke filluar nga ora 15:00 më 7 maj.
Megjithatë zëdhënësi i Vatikanit, Matteo Bruni theksoi se kjo ndërprerje nuk do të prekë Sheshin e Shën Pjetrit, ku mijëra besimtarë pritet të grumbullohen për të pritur shpalljen e pasardhësit të Papa Françeskut, i cili ndërroi jetë një ditë pas Pashkëve (21 prill).
Rikthimi i sinjalit do të bëhet pasi të emërohet Papa i Ri.
Një ditë më parë kardinalët firmosën betimin e sekretit, ndërsa vijojnë punimet për zhvillimin e konklavës. Punëtorët vendosën perde të kuqe në “llozhën e bekimeve “, ballkonin e famshëm në Bazilikën e Shën Pjetrit si pjesë e përgatitjeve të fundit për konklavën, që pritet të fillojë të mërkurën pasdite.
