Gjykata e Posaçme shpalli fajtorë dhe dënoi me 7 të pandehurit e dosjes së zyrtarëve që merrnin ryshfet për të dhënë banesa sociale në Durrës.
Verdikti erdhi pas pretencës së SPAK, ndërkohë që dënimi me burgim është dhënë për 3 prej tyre, kurse 4 të tjerëve iu konvertua në shërbim prove dënimi i mbetur, me masa nga 1-4 vite me kusht. Të pandehurit akuzohen se merrnin ryshfete nga 5-10 mijë euro.
GJKKO dënoi me 2 vite e 4 muaj burg Gëzim Sylaj, 1 vit e 4 muaj burg Vasil Karasaliun dhe 2 vite burg Viola Memën dhe me 2 vite Behare Luzin. 7 të dënuarit morën gjykim të shkurtuar dhe iu ul dënimi me 1/3-at.
Hetimet kishin nisur prej vitti 2023 ndaj të pandehurve: Gëzim Sylaj, Vasil Karasaliu, Viola Mema, Behare Luzi, Enxhi Çelaj, Gazmend Panxha dhe Sokol Sylaj.
“Në përfundim të gjykimit, Gjykata e Posaçme e Shkallës së Parë për Korrupsionin dhe Krimin e Organizuar me trup gjykues të përbërë nga gjyqtarët Bib Ndreca, Etleva Deda dhe Erjon Çela, me vendimin Nr. 33, datë 28.04.2025 vendosi deklarimin fajtorë”, thuhet në verdikt mes të tjerash dhe më tej jepen dënimet përfundimtare që do vuajnë.
