Prokuroria e Tiranës ka përfunduar hetimet për vrasjen e shtetasit A.H. dhe ka dërguar në gjyq shtetasin D.K., i cili akuzohet për “Vrasje me dashje” sipas nenit 76 të Kodit Penal.
Ngjarja ka ndodhur më 24 gusht 2024, kur A.H. ndërroi jetë pas një konflikti me D.K. dhe A.M. Sipas hetimeve, D.K. u përfshi në një grindje me A.H. dhe A.M., të cilët dyshohet se ngacmuan të fejuarën e tij.
Gjatë konfliktit, D.K. goditi A.H. disa herë me thikë, duke i shkaktuar vdekjen. Prokuroria kërkoi dërgimin në gjyq të D.K. për këtë vepër penale.
NJOFTIMI:
Prokuroria pranë Gjykatës së Shkallës së Parë të Juridiksionit të Përgjithshëm, Tiranë përfundoi hetimet dhe dërgon në gjyq shtetasin D.K. për veprën penale ‘Vrasja me dashje’ parashikuar nga neni 76 i Kodit Penal.
Nga hetimet e procedimit penal nr. 5141, të vitit 2024, rezultoi se më datë 24.08.2024 ndërroi jetë nga plagosja me thikë shtetasi A.H., ndërsa u arrestuan në flagrancë shtetasit D.K. dhe A.M.
E gjithë ngjarja nisi kur viktima A.H. dhe miku i tij, A.M dyshohet se ngacmuan me fjalë një vajzë, veprim ky që u pa nga ballkoni nga shtetasi D.K. i cili më pas u konfliktua me dy personat.
Në konflikt e sipër, ky shtetas qëlloi disa herë me mjet prerës thikë, në pjesë të ndryshme të trupit, shtetasin A.H., duke i shkaktuar më pas atij vdekjen. Ky shtetas deklaroi se personat në fjalë ngacmuan të fejuarën e tij e cila ishte nisur të takonte një të afërmen e saj dhe pasi e pa tërë skenën nga ballkoni, ai zbriti duke marrë me vete edhe një thikë, teksa pranoi se në konflikt e sipër e goditi disa herë në krah dhe në pjesën e barkut.
Bazuar sa më sipër, Prokuroria pranë Gjykatës së Shkallës së Parë të Juridiksionit të Përgjithshëm Tiranë, kërkoi dërgimin në gjyq të shtetasit D.K. për veprën penale ‘Vrasje me dashje’.
