Prokurorja e Lushnjës, Merita Selimi, e cila ishte në listën e Laert Haxhiut për tu vrarë, ka kaluar “Vettingun”, duke rihyrë sërish në sistemin e prokurorisë. Në 27 korrik 2023, Selimi u shkarkua nga Komisioni i Pavarur i Kualifikimit, por pas ankimit të depozituar në Komisionin e Posaçëm të Apelimit, trupa gjyësore e kësaj të fundit vendosi me shumicë votash, që Merita Selimi, të rikthehet në detyrë.
Merita Selimi e filloi karrierën në sistemin e drejtësisë në vitin 1992 dhe prej atëherë punoi në Prokurorinë e Lushnjës. Së fundmi, pas konfigurimit të hartës së re gjyqësore, ajo e ushtroi funksionin në Prokurorinë e Fierit.
Në muajin Tetor 2023, prokurorja Selimi u mor në mbrojtje fizike nga komisariati i Lushnjës, pasi një dëshmi e bashkëpuntorit të prokurorisë SPAK, Artan Tafani, tregoi se ajo dhe dy emra të tjerë të Drejtësisë Shqiptare, ishin në listën e personave që i dënuari me burg përjetë Laert Haxhiu, kërkonte t’i vriste.
Selimi, ishte prokurorja që hetoi Laert Haxhiun, Orgest Bilbilin dhe Anterio Kaloshin për masakrën e vitit 2017, ku mbeti i vrarë Zamir Latifi dhe Jurgen Hoxha, ndërsa u plagosën Bujar Turku dhe Marjus Xhepexhiu.
Pas dy viteve hetime, Selimi vendosi të shpallë mos kompetencën nga prokuroria e Lushnjës, duke transferuar dosjen ndaj tre të pandehurve në SPAK, ku gjykata vendosi dënimin e 3 personave me burgim të përjetshëm.
