Kryeministri Edi Rama zhvilloi një takim me Asambletë e degëve të Partisë Socialiste në Tiranë, paraditen e së enjtes.
Në këtë takim, kreu i qeverisë theksoi se “Shqipëria ka sot një tjetër reputacion, por nuk është në atë fazë që reputacioni është i pavarur nga ata që janë në pushtet”.
“Kjo do të ndodhë kur të hyjmë në Bashkimin Evropian. Atëherë Shqipëria do të jetë e barabartë në dinjitet, për barazi në ekonomi dhe standarde. Do të jetë një rrugë që do të vijojë. Kjo pasi kur një vend hyn në BE përfiton nga të tjerët. Kemi qenë një komb dhe popull i poshtëruar. Tani i kemi ardhur shumë pranë mundësisë për të marrë hak, në kuptimin pozitiv, për të hequr një herë e përgjithmonë nga qafa zgjedhën e të parit nga lart poshtë dhe të trajtuarit si popull dhe njerëz të dorës së dytë”, tha ai.
Rama u ndal edhe tek opozita, që u shpreh se vijon të mbetet e njëjta në sjellje dhe qasje:
“Zhabat janë plakur, bretkosat janë sfilitur, zhapikët janë çmendur, por janë aty me bufin në krye që është si ajo jep shpirt, por nuk heq dorë. “Këneta” këtë punë ka. Për ata që kanë pak kujtesë, po ta bënim këtë mbledhje në vitin 2013, do ta bënim me gjeneratorë. Janë disa që hyjnë e dalin nga këneta. Futen në kënetë e dalin në televizion”.
