Një 35-vjeçar është arrestuar nga policia e Vlorës në lidhje me tre raste të vjedhjes së biçikletave në këtë qytet gjatë muajit dhjetor.
Kanë qenë pamjet filmike të kamerave rreth vendngjarjeve ato që kanë çuar në identifikimin e 35-vjeçarit.
Blutë njoftojnë se në cilësinë e provës materiale u sekuestruan tre biçikletat e vjedhura, ndërsa vijon puna për dokumentimin e rasteve të tjera ku 35-vjeçari mund të ketë qenë autor.
Njoftimi:
Shërbimet e Komisariatit të Policisë Vlorë, në vijim të punës për parandalimin e vjedhjeve, zbardhjen e atyre të ndodhura më parë dhe vënien e autorëve përpara përgjegjësisë ligjore, pas një pune hetimore, bazuar dhe në informacionet e siguruara nga inteligjenca informative, organizuan dhe finalizuan me sukses operacionin policor të koduar “Pedalimi”, si rezultat i të cilit u vu në pranga shtetasi:
D. A., 35 vjeç, banues në Vlorë.
Nga këqyrja e pamjeve filmike dhe veprimet e tjera hetimore dyshohet se ky shtetas ka vjedhur 3 biçikleta në Vlorë, gjatë muajit dhjetor.
Në cilësinë e provës materiale u sekuestruan 3 biçikletat e vjedhura.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprën penale “Vjedhja”.
