Presidenti Emmanuel Macron ka emëruar Francois Bayrou si kryeministër të ri të Francës, tha zyra e tij në një deklaratë.
Bayrou zëvendëson Michel Barnier i cili dha dorëheqjen javën e kaluar pasi politikanët e ekstremit të djathtë dhe të majtë votuan për rrëzimin e qeverisë, duke e zhytur Francën në krizën e dytë të madhe politike në gjashtë muaj.
Bayrou është lideri i partisë centriste MoDem dhe pritej si një nga zgjedhjet e mundshme të Macron për postin pasi ai raportohet se u takua me presidentin të premten në mëngjes.
Por në atë kohë nuk ishte e qartë nëse Macron planifikonte të priste Bayrou për të shpallur emërimin e tij ose për ta informuar atë se kishte zgjedhur një kandidat tjetër.
Njoftimi vjen pas ditësh bllokimi për gjetjen e një kandidati për të zëvendësuar Michel Barnier, rrëzimi i të cilit nga parlamenti e shtyu Francën në një krizë të re.
Emërimi i Bayrou e bën atë kryeministrin e tretë që Franca ka parë në vitin 2024, pas Michel Barnier dhe Gabriel Attal.
Attal dha dorëheqjen në korrik pas zgjedhjeve të parakohshme, por qëndroi me ministrat e tij në detyrën e kujdestarit gjatë 50 ditëve që Franca mbeti pa një kryeministër zyrtar.
