Javën e ardhshme opozita do të “shpërngulet” në Strasburg ashtu siç kanë paralajmëruar për të protestuar kundër qeverisë.
Gazetari Osman Stafa ka zbardhur për “BalkanWeb” skenarin që do të ndjekin deputetët e PD. Sipas tij, deputetët e PD-së pritet të ndahen në dy grupe.
“Shumica e deputetët do të udhëtojnë drejt Strasburgut më 23 tetor për të protestuar para Parlamentit Europian, në të njëjtën ditë kur PE mblidhet në seancë plenare. Deputetët e PD-së pritet të ndahen në dy grupe. Njëri grup prej 5 apo 6 deputetësh do të hyjnë brenda PE për të zhvilluar takime njoftuese ndaj eurodeputetëve për t’i njoftuar ata sa i takon situatës në Shqipëri dhe shkeljeve ligjore, kushtetuese që ka bërë qeveria e kryeministrit Edi Rama. Burgosja e Salianjit, mosvotimi i PS për vendimin e GJK, lidhjet e qeverisë me krimin, korrupsioni janë disa nga çështjet e diskutimit në fokus të takimeve”, tha ai.
Po kështu, përveç këtij grupi, pjesa tjetër e deputetëve të shpalosin pankarta para Parlamentit Europian dhe të protestojnë për një kohë të caktuar për të tërhequr vëmendjen e europianëve për situatën në Shqipëri që ata e cilësojnë ngjizjen e një regjimi diktatorial.
