Në portalin “Infermierë për Shqipërinë” deri tani kanë aplikuar 1200 kandidatë për 420 vende të lira pune.
Ministrja e Shëndetësisë, Ogerta Manastirliu duke ftuar të gjithë ata që dëshirojnë të aplikojnë në këtë portal, të lançuar që prej 10 janarit 2018, sjell në vëmendje rastin e një infermiereje, Arianës nga qyteti i Gjirokastrës, e cila punonte prej 16 vitesh në reanimacionin e spitalin rajonal të këtij qyteti, por u hoq nga puna pa arsye.
Sipas saj, si Ariana janë me dhjetra infermiere në të gjithë vendin që janë pa punë për shkaqe që nuk lidhen aspak me profesionalizmin e tyre.
Gjatë një takimi të zhvilluar në Gjirokastër me gra të këtij qytetit, ku ishte e pranishme edhe deputetja e këtij qarku dhe njëkohësisht ministrja e Kulturës, Mirela Kumbaro, ministrja Manastirliu ftoi Arianën të aplikojë në këtë portal, pasi është mundësia e vetme e punësimit si infermiere në qendrat shëndetësore dhe spitalet publike.
Ministrja Manastirliu thekson se afati i fundit i aplikimit në këtë portal është data 1 shkurt 2018.
“Ariana punonte prej 16 vitesh në reanimacionin e spitalin rajonal të Gjirokastrës por u hoq nga puna pa arsye. Si Ariana, janë me dhjetra infermiere në të gjithë vendin që janë pa punë për shkaqe që nuk lidhen aspak me profesionalizmin e tyre. E ftova Arianën të aplikojë në portalin www.infermierepershqiperine.al sepse tanimë ka vetëm një mundësi punësimi si infermiere në qendrat shëndetësore dhe spitalet publike; portali “Infermierë për Shqipërinë. Kanë aplikuar 1200 kandidatë deri në këto momente për 420 vende të lira pune. Afati i fundit i aplikimit është data 1 Shkurt 2018”, shkruan ministrja e Shëndetësisë në një postim në Facebook.
Portali “Infermierë për Shqipërinë”, i lançuar më 10 janar të këtij viti, do të siguroj transparencë të plotë dhe punësim sipas meritës të infermierëve. Në portal kandidatët mund të shikojnë hapësirat e lira, si dhe të aplikojnë nëse përmbushin kriteret.
Kjo dritare e re do të ofrojë mundësi punësimi reale sipas një sistemi transparent.
.
