Presidenti i Venezuelës, Nicolas Maduro fitoi rizgjedhjen për një mandat të tretë 6-vjeçar me 51.2 për qind të votave. Këtë e bëri të ditur Këshilli Zgjedhor pas një fushate të njollosur me akuza për frikësim nga opozita dhe frikë për mashtrim.
Elvis Amoroso, president i organit elektoral CNE, besnik ndaj qeverisë, u tha gazetarëve se 44.2 për qind e votave shkuan për kandidatin e opozitës, Edmundo Gonzalez Urrutia, i cili kryeson në sondazhe. Pjesëmarrja në votime ishte 59%. CNE denoncoi gjithashtu “një sulm ndaj sistemit që shkaktoi vonesa”.
Pas fitores, Maduro u shpreh se; “Ata nuk ia dolën me sanksione, me agresion, me kërcënime. Nuk ia dolën tani dhe nuk do t’ia dalin kurrë me dinjitetin e popullit të Venezuelës. Fashizmi në Venezuelë, në tokën e Bolivarit dhe Chavezit, nuk do të kalojë.”. Presidenti Nicolas Maduro, i cili po feston me mijëra mbështetës që janë mbledhur para Pallatit Miraflores kujtoi Chavez. “Chavez jeton. Chavez, ky triumf është i yti”, tha ai.
