Një ngjarje e rëndë është regjistruar në Kavajë, ku një 66-vjeçar rus është gjetur pa shenja jete në banesën e tij. Policia ka njoftuar se shtetasi rus prej disa ditësh nuk përgjigjej në telefon, e kjo i detyroi uniformat blu që të shkojnë në shtëpinë e tij.
Shërbimet e Policisë kanë hapur me forcë derën e banesës, ku kanë gjetur pa shenja jete shtetasin me inicialet V. U.
“Rreth orës 22:00, Policia e Kavajës është njoftuar se shtetasi rus V. U., rreth 66 vjeç, i cili jetonte në katin e tretë të një pallati në Golem të Kavajës, nuk përgjigjej prej disa ditësh në telefon.
Menjëherë shërbimet e Policisë kanë shkuar në adresën e dhënë dhe kanë konstatuar se dera e jashtme e banesës ishte e mbyllur. Shërbimet e Policisë kanë hapur me forcë derën e banesës, ku kanë gjetur pa shenja jete shtetasin V. U”, thuhe në njoftimin e policisë.
Në vendngjarje shkoi grupi hetimor i cili nën drejtimin e Prokurorit po kryen veprimet për sqarimin e rrethanave dhe dokumentin ligjor të shkakut të humbjes së jetës të 66-vjeçarit.
