Manchester Unitedi është treguar bindës në fitoren prej 2-0 kundër Benficas në Old Trafford, në ndeshjen e xhiros së katërt të fazës grupore të Ligës së Kampionëve.
Në minutën e 15-të, u akordua penalti për Djajtë e Kuq, mirëpo goditjen e Anthony Martial e mbrojti portieri mysafir.
Megjithatë, rezultati u zhbllokua në fund të pjesës së parë. Nemanja Matic goditi drejt portës, topi u përplas në shtyllë dhe preku trupin e portierit Mile Svila duke u kthyer në rrjetë (45).
Pas kësaj fitoreje, Manchester Unitedi vazhdon me rekordin e 100% në fazën grupore dhe numëron 12 pikë pas katër xhirosh.
Goli i dytë i United u realizua nga Daley Blind, i cili u tregua i saktë nga pika e bardhë (78’).
Ndeshja tjetër e Grupit A është mbyllur me fitoren e CSKA Moskës në udhëtim te Baseli.
Ekipi ku aktivizohen Taulant Xhaka dhe Albian Ajeti ishte në epërsi me golin e shënuar nga Luca Zuffi.
Mirëpo, mysafirët shënuan dy herë për ta përmbysur rezultatin, me golat e Alan Dzagoev (65’) dhe Pontus Wernbloom (79’).
Të dyja këto skuadra tash numërojnë nga gjashtë pikë prej katër xhirove të para.
