Kryeministri Edi Rama ka zhvilluar një bisedë telefonike paraditen e sotme me Kryeministrin e Britanisë së Madhe Rishi Sunak.
Lajmi është bërë i ditur zyrtarisht nga qeveria britanike, përmes një njoftimi për shtyp, ku sqarohet se Rama-Sunak biseduan për marrëdhëniet e ngushta mes Britanisë së Madhe dhe Shqipërisë, duke vënë në dukje bashkëpunimin e rëndësishëm dypalësh, duke përfshirë tregtinë dhe investimet.
Dy liderët folën edhe për emigrantët. Rama dhe Sunak ranë dakord se më shumë punë nevojitet për t’u bërë në lidhje me migracionin e paligjshëm në Europë. Këtë çështje do ta diskutojnë nga afër në takimin e Komunitetit Politik Europian në Mbretërinë e Bashkuar në muajin Korrik.
Rama dhe Sunak theksuan gjithashtu rëndësinë e stabilitetit në Ballkanin Perëndimor, veçanërisht në Bosnje-Hercegovinë dhe Kosovë.
