Një shqiptar është dënuar me 32 muaj burg pasi tentoi të trafikonte 12 emigrantë në Britania e Madhe, në një jaht të tejmbushur, me motor të dëmtuar.
Bëhet fjalë për Eduard Mucajn, 50 vjeç nga Shqipëria, që u arrestua nga zyrtarët e Forcave Kufitare pasi lundroi “në mënyrë të parregullt” nga Holanda për në Lowestoft, Suffolk, gushtin e kaluar.
50 vjeçari konsiderohet nga mediet britanike si një kontrabandist “cinik dhe i pamatur” i njerëzve që kaloi Detin e Veriut në një jaht të vogël.
Mes 12 emigrantëve shqiptarë ishte edhe një 8-vjeçar të cilët u gjetën nën kuvertë, pa jelek shpëtimi. Dy nga emigrantët ishin dëbuar më parë nga Britania e Madhe për kryerjen e veprave të rënda.
Jahti kishte një motor të dëmtuar, nuk kishte pajisje sigurie dhe ishte më shumë se trefishi i kapacitetit të tij.
Mucaj ishte nisur nga Den Oever në Holandë në orët e para të 9 gushtit.
Roja bregdetare holandeze gjurmoi jahtin e tij i cili po lundronte “në mënyrë të çrregullt”. Zyrtarët u përpoqën të lidhnin kontakte me Muçajn dhe, kur ai nuk iu përgjigj thirrjeve të tyre, u alarmua Home Office.
Forcat Kufitare kapën jahtin dy ditë më vonë kur ai hyri në ujërat e Mbretërisë së Bashkuar.
