Përforcohet edhe më tej pista se 39-vjeçari shqiptar Bledar Dedja u vra si pasojë e një krimi pasioni.
Mediat italiane kanë publikuar këtë të mërkurë rezultatet e autopsisë, që vërtetojnë dyshimet se shqiptari humbi jetën si pasojë e një goditje të marrë në mushkëri, goditje që i erdhi nga pas.
Dedja u godit mbi 20 herë me thikë mbrëmjen e së shtunës. Kjo është edhe nata kur ndërroi jetë, e konfirmuar tashmë edhe nga ekspertiza mjeko-ligjore. Ai u gjet i pajetë mëngjesin e së dielës në një pyll të Paderno del Grappa, në Asolo të Treviso-s.
Nga rezultatet e autopsisë konfirmohen disa detaje: Pjesa më e madhe e plagëve u shkaktuan gjatë tentativës së 39-vjeçarit për t’u vetëmbrojtur. Pikërisht fakti se pjesa më e madhe e plagëve janë sipërfaqësore, për hetuesit janë tregues se autor i krimit ka qenë një person i vetëm dhe shanset që të ketë qenë një person i dytë janë të pakta, pasi do të kishte ndërhyrë në mënyrë që ta neutralizonte.
Mediat italiane shkruajnë se në qendër të këtyre hetimeve është një krim pasioni.
Ka disa indicie që i bëjnë hetuesit të besojnë se bëhet fjalë pikërisht për një krim të tillë. Dedja u gjet me pantallonat e ulura dhe vendi ku u gjet njihet si një zonë që frekuentohet nga çiftet.
Hipoteza e një grabitjeje që shkoi keq ra thuajse që prej fillimisht, për shkak se në makinën e viktimës, e cila ndodhej rreth 100 metra larg trupit të tij, u gjetën të gjitha sendet me vlerë.
Celulari i 39-vjeçarit po analizohet me vëmendje nga hetuesit, të cilët kërkojnë të dhëna për një lidhje të mundshme jashtëmartesore, që mund t’i ketë kushtuar jetën Dedjas. Hetuesit po përpiqen që të rindërtojnë orët e fundit të tij, nëpërmjet mesazheve dhe telefonatave, për të zbuluar se kë do të takonte ai pasditen e së shtunës.
Po sipas asaj që shkruajnë mediat fqinje, përgjatë këtyre ditëve janë marrë në pyetje disa persona. Në mesin e familjarëve dhe miqve të tij, rezulton se në pyetje është marrë edhe një grua. Kjo e fundit para hetuesve ka deklaruar se e kishte njohur Dedjan dy vjet më parë, nëpërmjet një aplikacioni takimesh.
Bledar Dedja ishte i martuar dhe baba i dy fëmijëve.
