Futbollisti i Egnatias, Raphael Dwamena, mbërriti pa shenja jete në spitalin e Kavajës, ndërsa mjeku Riza Lala thotë se u bënë të gjitha përpjekjet për ta risjellë në jetë.
Mjeku tha se përpjekjet ishin pa rezultat, pasi futbollisti kishte ndërruar jetë.
“Rreth orës 14:00, lajmërohemi nga ekipi mjekësor i Rrogozhinës për një rast të ndodhur në fushën e sportit Egnatia, për gjendje të fikti. Rreth orës 14:07, na vjen rasti në urgjencë. Ishte me shenja jetësore. Ne si ekip mjekësor i kishim marrë masat, sepse ishim të lajmëruar. U munduam me të gjitha mundësitë, sipas protokollit, por pa rezultat”.– tha ai
Trupi pajetë i kapitenit 28-vjeçar të Egnatias, që e deshi futbollin deri në çastet e fundit të jetës pavarësisht problemeve shëndetësore që kishte, u dërgua në Tiranë për kryerjen e ekspertizës mjeko-ligjore.
Lojtari 28-vjeçar pësoi një atak kardiak në minutën e 25-të të ndeshjes me Partizanin. Ai u dërgua menjëherë në spital me ambulancë, por fatkeqësisht nuk mundi të mbijetonte. / Top Channel
